Nima uchun kosmetik mahsulotlarga E vitamini qo‘shiladi? Uning teriga qanday foydasi bor?

E vitamini teri parvarish qilish mahsulotlarining keng tarqalgan tarkibiy qismidir. U losyonlardan tortib sivorotkagacha bo‘lgan hamma narsada mavjud. Bu ko‘pchilikka C vitaminining faol sherigi sifatida ma’lum bo‘lishi mumkin — ushbu ikki ingredient yonma-yon yuradi, chunki E vitamini S vitaminini barqarorlashtirishga yordam beradi, shuning uchun u ko‘plab yuz kremlariga kiritilgan. “Noviy ochag” nashri nima uchun E vitamini kosmetik mahsulotlarga qo‘shilishi va teriga qanday ta’sir qilishini aniqlashga qaror qildi.

E vitamini mashhur antioksidantdir. Oksidlanish jarayonidan kelib chiqqan hujayra shikastlanishini zararsizlantirish yoki kamaytirishga yordam beradi. Bu uning qarishga qarshi ta’sirini anglatadi. Bu terini o‘zgartira oladigan haqiqiy super agent hamda yallig‘lanishni yengillashtiruvchi vitamin.

E vitaminining foydali xususiyatlari

Ratsionda E vitamini bo‘lgan mahsulotlar nafaqat terining holatini yaxshilashga yordam beradi, balki ichki organlar faoliyatini ham tartibga soladi. Qon ivishini nazorat ostida ushlab turadi, qon quyqalarini paydo bo‘lishining oldini olishga yordam beradi, katta va kichik tomirlarning elastikligini yaxshilaydi, shuningdek, xolesterin ortishini sekinlashtiradi. Bundan tashqari, bu vitamin reproduktiv tizimning normal ishlashi uchun juda muhimdir. U sut mahsulotlari, yong‘oqlar, o‘simlik moylari, ko‘kat va sabzavotlarda mavjud.

E vitaminini teri yuzasiga qo‘llash ham samaralidir: uni yuzga yog‘ konsentrati sifatida surtish yoki teriga mos keladigan ushbu ingredientni o‘z ichiga olgan kosmetika mahsulotdan foydalanish mumkin.

Rangni o‘zgarishidan himoya qilish

Agar yuz terisi qora dog‘lar yoki giperpigmentatsiyaga moyil bo‘lsa, terini parvarish qilish uchun E vitaminini qo‘shish juda muhimdir. Uning antioksidant ta’siri quyosh nurida teri qorayishining oldini oladi.

Qarishga qarshi ta’sir

Antioksidant sifatida E vitamini ham erkin radikallar ta’sirida terining shikastlanishini yumshatadi. Atrof-muhitning oksidlovchi stressi va ichki qarish bilan kurashishga yordam beradi va uni kuchli qarishga qarshi tarkibiy qismga aylantiradi.

Yallig‘lanishga qarshi xususiyatlar

E vitamini husnbuzar paydo bo‘ladigan ta’sirchan terini tinchlantiradi. Yallig‘lanishga qarshi xususiyatlar mavjud toshmalarni kamaytirishga yordam beradi va yangilari paydo bo‘lishining oldini oladi. Shuningdek, husnbuzardan keyingi har qanday rang o‘zgarishini kamaytiradi.

Tavsiyalar va nojo‘ya ta’sirlar

E vitaminini o‘z ichiga olgan mahsulotlar har qanday teri turlariga mos keladi. Ammo istisnolar mavjud. Agar terining teshiklari kattalashgan hamda yog‘li bo‘lsa, E vitaminini faqat boshqa mahsulotlar bilan birgalikda ishlatish mumkin — sof E vitamini moyidan foydalanish tavsiya etilmaydi. Bu ko‘z qovoqlari, lab chetlari va yuzning T zonasi kabi eng zaif joylarda oq dog‘lar va husnbuzar paydo bo‘lishiga olib kelishi mumkin. Yog‘ konsentrati quruq teri egalari uchun ko‘proq mos keladi.

Kosmetikani tanlash

E vitaminini namlantiruvchi, sivorotka va yuz uchun mo‘ljallangan yog‘lardan topish mumkin. Mahsulot tarkibida uning mavjudligini bilish uchun E vitaminining eng keng tarqalgan shakli bo‘lgan va ko‘pincha kosmetika sohasida qo‘llaniladigan tokoferolni qidirish kerak. Bir vaqtning o‘zida C va E vitaminli sivorotkadan foydalanish yaxshidir. Tandemda bu kuchli antioksidantlar oksidlovchi stressni kamaytirish, qora dog‘larni ketkazish va terini oqartirish uchun samaralidir.