Britaniyalik shifokorlar qonda tromb paydo bo‘lishining asosiy alomatini ma’lum qildi

Britaniyalik shifokorlar qonda tromblarning rivojlanishiga sabab bo‘ladigan asosiy alomatlarni ma’lum qildi, deb yozadi “Korrespondent.net”.

Foto: “Korrespondent.net”

Ta’kidlanishicha, tromboz mavzusi, ayniqsa, AstraZeneca vaksinasining nojo‘ya ta’siri haqidiga xabarlardan keyin dolzarb bo‘lib qoldi. Mutaxassislar tromblarni ko‘pincha qo‘l va oyoqda, asosan pastki qismda paydo bo‘lishidan ogohlantirdi.

Oyoq tomirlari trombozining belgilari:

• odatda boldir yoki bo‘ksada tortishib yoki pulsatsiyalanuvchi og‘riq;
• shish;
• og‘riqli hudud atrofida issiqlik hissi;
• og‘riqli hududning qizarishi yoki qorayishi;
• tomirlarning qattiqlashuvi va og‘rig‘i.

Bundan tashqari, nafas olishning qiyinligi, qattiq yo‘tal, ko‘krak qafasda og‘riq va bosh aylanishi − bu trombning o‘pkaga ko‘chib o‘tganidan darak beradi. Agar shu kabi alomatlar kuzatilsa, darhol tibbiy yordamga murojaat qilish tavsiya etiladi. Trombozning oldini olish uchun esa shifokorlar uzoq vaqtli harakatsiz ish vaqtida sport bilan shug‘ullanish va faol tanaffuslar qilishni maslahat beradi.

Manba