Olimlar ko‘k choyning kutilmagan xususiyatlarini aniqladi

Syurixdagi Federal texnologiya institutining bir guruh olimlari ko‘k choyning organizmga ta’siri avval o‘ylanganidan ancha murakkab ekanligini aniqladi. Tadqiqot natijalari Aging jurnalida chop etildi, deb yozadi “Korrespondent.net”.

Ma’lumki, ichimlik tarkibida qarish jarayonini sekinlashtiradigan katexinlar mavjud. Ushbu moddalar erkin kislorod radikallari tufayli tanadagi stressning oldini oluvchi antioksidantlar hisoblanadi. Shunday qilib, ular hujayralar yoki DNKga zarar yetkazmaslikka yordam beradi.

Biroq caenorhabditis elegans chuvalchangi ustida o‘tkazgan tajribalar shuni ko‘rsatdiki, ko‘k choy katexinlari aslida antioksidantlar emas. Aksincha, ular oksidlanish jarayonlarini rag‘batlantiradi va shu bilan emlash kabi tananing himoyasini yaxshilaydi.

“Bular antioksidantlar emas, balki vaksina kabi tananing o‘zini himoya qilish qobiliyatini yaxshilaydigan prooksidantlar”, – deya tushuntiradi professor va tadqiqot guruhi rahbari Maykl Ristou.

Tadqiqot mualliflarining ta’kidlashicha, stressning qisqa muddatli ko‘rinishi organizmga ushbu zararli jarayonga moslashishga va hujayralarning himoya qobiliyatini oshirishga imkon beradi.

Tajribalar katexinlar eksperimental nematodalarning umrini uzaytirishini va jismoniy holatini yaxshilashini tasdiqladi. Ristou ko‘k choy ichishni tavsiya qiladi: qora choyda fermentatsiya tufayli foydali prooksidantlar yo‘q bo‘lib ketadi.

Mavzuga doir:

• Nima uchun tongni iliq suv ichish bilan boshlash kerak?
• Bir kun ichida detoksni amalga oshirishga yordam beradigan 6 samarali usul
• Organizmdagi toksinlardan xalos bo‘lish va bir necha kilogrammga ozish uchun 3 xil detoks retsepti