Ertalab och qoringa kefirli grechka iste’mol qilish nimasi bilan foydali?

Grechkani kefir bilan iste’mol qilish — bu organizmni toksinlardan tozalash, ovqat hazm qilish, metabolizmni yaxshilash va vaznni kamaytirishning eng oddiy, ammo juda samarali usuli, deb yozadi Wday.

Foto: Pinterest

Nima uchun ertalab och qoringa kelfirli grechka iste’mol qilish foydali hisoblanadi?

Grechka o‘simlik oqsili va sog‘lom uglevodlar manbai bo‘lib, u uzoq vaqt davomida to‘qlik hissi va energiya beradi. Bundan tashqari, grechkada inson salomatligi uchun zarur bo‘lgan ko‘plab mikroelement va vitaminlar mavjud:

• kaliy;
• temir;
• fosfor;
• yod;
• foliy kislotasi;
• niotsin;
• B guruhi vitaminlari;
• PP vitamini.

Shuningdek, grechka antioksidantlarning eng yirik manbai hisoblanadi — hujayra qarishini sekinlashtirish qobiliyati ilmiy jihatdan tasdiqlangan. Kletchatkaga boy bo‘lgan xom donlar ovqat hazm qilishni yaxshilashga va qonda shakar darajasini pasaytirishga yordam beradi. Shifokorlar gipertoniya, ateroskleroz, tromboz, revmatizm, qandli diabet kabi kasalliklarning oldini olish uchun kundalik ratsionga grechkani kiritishni tavsiya etadi.

Kefirda esa ovqat hazm qilish traktining faoliyatini yaxshilaydigan muhim aminokislota va bifidobakteriyalar ham mavjud. Ikkala mahsulot ham bir-birini mukammal ravishda to‘ldiradi, organizmni barcha kerakli oziq moddalar bilan ta’minlaydi, lekin ortiqcha yog‘ va uglevodlar bilan qiynamaydi.

Ertalab och qoringa kefirli grechka iste’mol qilish organizmni tozalashga, to‘plangan toksinlarni chiqarib tashlashga, qondagi qand miqdorini normallashtirishga yordam beradi.

Grechka qo‘shilgan sutli sho‘rva retsepti

Foto: Pinterest

Kerakli mahsulotlar:

• sut — 1 litr;
• grechka — 0,5 stakan;
• shakar — 1,5 osh qoshiq;
• tuz — bir chimdim;
• sariyog‘ — 25 gramm.

Sut qaynatib olinadi. Oldindan yuvilgan grechka sutga qo‘shiladi, olov pasaytirilib, vaqti-vaqti bilan aralashtiriladi va 15 daqiqa davomida pishiriladi. Tuz va shakar qo‘shilgandan so‘ng yana 5 daqiqa pishiriladi. Sariyog‘ qo‘shib, iste’mol qilish mumkin.

Grechka va guruchli bo‘tqa retsepti

Foto: Pinterest

Kerakli mahsulotlar:

• grechka — 100 gramm;
• guruch — 100 gramm;
• o‘simlik yog‘i — 1 osh qoshiq;
• suv — 2,5 stakan;
• tuz.

Guruch va grechka aralashtiriladi va suv tiniq bo‘lguncha yuviladi. Idishda suv qaynatib olinadi, grechka-guruch aralashmasi qo‘shiladi. Suv qaynashi bilanoq tuz va o‘simlik moyi qo‘shiladi. Olov pasaytiriladi va suv deyarli bug‘lanib ketguncha 15 daqiqa qaynatib olinadi. Tayyor bo‘lgach, bo‘tqa olovdan olinib, qopqog‘i yopiladi va 10 daqiqa davomida sochiq bilan o‘raladi. Bu vaqt ichida don qolgan namlikni shimib oladi. Bo‘tqaga sariyog‘ qo‘shib, iste’mol qilish mumkin.

Kefirli grechkani qanday pishirish va iste’mol qilish kerak?

Grechka tarkibidagi ozuqa moddalari va kletchatkaning maksimal miqdorini saqlab qolish uchun uni pishirish shart emas. Kefirga qo‘shilgan xom grechka juda yoqimli ta’m va tuzilishga ega bo‘ladi.

• Buning uchun 2 osh qoshiq grechka sovuq suvda yuvilib, so‘ngra ustidan qaynoq suv quyiladi.
• Suv shimib olingach, grechka idishga solinadi va 200 ml kefir quyiladi. Muzlatkichda bir kecha qoldiriladi.
• Uni ertalab, och qoringa, nonushta o‘rniga iste’mol qilish mumkin.
• Tuz, shakar, sariyog‘ va boshqa mahsulotlar qo‘shilmaydi.

Agar maqsad vazn yo‘qotish bo‘lsa, kefirli grechkani ertalabki nonushtaga bir haftadan ikki haftagacha iste’mol qilish kerak. Kundalik kaloriya iste’molini kuzatib borish lozim: agar boshqa ovqatlar kaloriyalarda juda yuqori bo‘lmasa, tez orada ijobiy natijalarni sezish mumkin. Organizmni tozalash, vitamin va kletchatkaga bo‘lgan ehtiyojni to‘ldirish uchun nonushtaga haftada bir yoki ikki marta kefirli grechka iste’mol qilish tavsiya etiladi.

Manba