Yozda sepish uchun mo‘ljallangan eng ommabop 10 ta erkaklar atiri
Yoqimli iforlar insonning kayfiyatini ko‘taradi, o‘ziga bo‘lgan ishonchini oshiradi. Qolaversa, boshqalarda unga nisbatan yaxshi taassurot uyg‘otishga imkon beradi. Shu sababdan nafaqat ayollar, balki erkaklar ham atirlardan birday foydalanadi.
Parfyumlarning ham kiyimlar kabi mavsumga mos turlari bor. Masalan, soha mutaxassislari qishda o‘tkirroq, shirinroq, yozda esa o‘ta yumshoq, mayin, sitrus iforli atirlardan foydalanishni tavsiya etadi.
Quyida yoz uchun mo‘ljallangan eng yaxshi atirlar o‘ntaligini taqdim etamiz. Aromamaster Dilshod Hojiqurbonovning mazkur tavsiyalari jaziramada qanday parfyum sotib olishga ikkilanib turgan erkaklarga asqatadi deb o‘ylaymiz.
POLO
Blue Ralph Lauren — erkaklar uchun mo‘ljallangan mazkur parfyum Polo Blue Karlos Benaim va Kristof Laudamiel tomonidan yaratilgan. 2003-yildan ishlab chiqarila boshlangan. Atir bodring, qovun va mandarin, rayhon, zamsh, yog‘ochli notalar va mushk iforlarini o‘zida mujassam etgan.
LOUIS VUITTON
Afternoon Swim — sitrus iforli parfyum bo‘lib, parfyumer Jak Kavaler tomonidan yaratilgan. 2019- yildan sotuvga chiqarilgan. Atirning o‘ziga xos xususiyati shundaki, undan nafaqat erkaklar, balki ayollar ham birdan foydalanishi mumkin.
VERSACE MAN
Eau Fraiche Versace — erkaklar uchun mo‘ljallangan mashhur parfyumlardan biri bo‘lib, parfyumer Olivier Cresp tomonidan yaratilgan. 2006-yildan sotuvga qo‘yilgan.Atir limon, bergamot, kardamon va brazil atirgul daraxti, sadr, estragon, mushk, yog‘ochli notalar, za’faron iforlaridan tashkil topgan.
BVLGARI
Aqva pour Homme — dunyoga mashhur parfyumer Jak Kavaler tomonidan dengiz romantikasini xush ko‘ruvchi erkaklar uchun yaratilgan. Parfyum o‘zida mevalar, yog‘ochli notalar va dengiz o‘tlarini mujassamlashtirgan. Bu tetiklantiruvchi iforlar ayni issiq mavsumga mos keladi.
GIORGIO ARMANI
Acqua di Gio Profumo — parfyumer Alberto Morillas tomonidan yaratilgan aromatik suvli parfyumdir. 2015-yildan ishlab chiqarila boshlangan.Atir dengiz notalari, bergamot kabi bir necha iforlarni o‘zida mujassam etgan.
GIORGIO ARMANI
Acqua di Gio parfyumi ham Giorgio Armani kompaniyasiga tegishli, bir necha mashhur parfyumerlar Alberto Morillas, Annik Menardo va Kristian Dussulier hamkorligida yaratilgan. 1996-yildan ishlab chiqarila boshlangan.Atir limon, bergamot, apelsin, mandarin dengiz notalari, oq mushk, sadr, eman iforlaridan tashkil topgan.
CHANEL
Bleu de Chanel Parfum — erkaklar uchun mo‘ljallangan mashhur atirlardan biridir. U Olivier Polge tomonidan yaratilgan, 2018- yildan sotuvga chiqarilgan.
Parfyum o‘zida limon, bergamot, yalpiz, ananas, sadr kabi bir qator xushbo‘y iforlarni o‘zida aks ettiradi.
BVLGARI
Le Gemme Empyr — erkaklar uchun mo‘ljallangan yog‘ochli achchiq iforli parfyum bo‘lib, Bvlgari brendining yangi a’zosi hisoblanadi. Atir parfyumer Jak Kavaler tomonidan yaratilgan bo‘lib, 2021-yildan boshlab, atir ixlosmandlariga taqdim etilgan.Le Gemme Empyr zanjabil, sandal daraxtining eng xushbo‘y iforlarini mujassam etgan.
CREED
Aventus — mevali atirlar guruhiga mansub bo‘lib, 2010-yildan ishlab chiqarila boshlangan. Yaratuvchisi Jan-Kristof Herault va Ervin Crid hisoblanadi.Parfyum o‘zida ananas, bergamot, qora smorodina, olma, yasmin, atirgul, vanil kabi bir qator xushbo‘y iforlarni aks ettirgan.
CLINIQUE
Happy Clinique — sitrus iforlarni xush ko‘ruvchi erkaklar uchun mo‘ljallangan atir bo‘lib, 1999-yildan ishlab chiqarila boshlangan. Parfyum o‘zida mandarin, apelsin, limon, mushk, sadr kabi bir qator iforlarni mujassamlashtirgan.
Manba
Yangi ma'lumotlardan xabardor bo'lib boring
