Ozishda yugurishdan ham samaraliroq bo‘lgan sport mashg‘ulotlari

Ortiqcha vazn nafaqat tashqi ko‘rinishingiz, balki o‘zingizni qanday his qilishingiz asosiysi esa salomatligingizga ta’sir o‘tkazmay qolmaydi. Sog‘lom bo‘lish, o‘zingizga bo‘lgan ishonch va hayotiy quvvat ortishi uchun ham sport bilan shug‘ullanishni boshlashingiz kerak. Qanday mashqlar tez vazn tashlashga yordam berishini bilmayotganlar uchun quyida ma’lumotlar berib o‘tamiz.

1. Arqonda sakrash

Arqonda sakrash sizga bolalarga xos mashq bo‘lib tuyilishi mumkin, lekin uning haqiqatan ham ozishga yordami katta. Sakrash bir soatda 1000 kaloriya erishiga olib keladi, lekin ijobiy natija vazningiz og‘irligi va sakrash chastotangizga bog‘liq bo‘ladi. Kerak ekan, deb birdaniga bir soat to‘xtamay sakrash tavsiya qilinmaydi. Orada tanaffus bilan biroz dam olib, keyin yana davom ettiring.

2. Suzish

Suzish nafaqat vazn tashlash, balki chiniqish, tetiklashish uchun ham samarali hisoblanadi. Bir soat davomida kichik tanaffuslar bilan suzgan insonda 800 kaloriya erishi mumkin. Ushbu sport turi sog‘ligidagi muammo yoki jarohat sabab yugura olmaydigan, lekin vazn tashlashni istaganlar uchun ayni muddao.

3. Velosiped

Velosipedda harakatlanish qon aylanishining yaxshilanishi, o‘pka va yurak uchun foydali hisoblanadi. Velosiped uchishda qancha kaloriya erishi harakat tezligi va davomiyligiga bog‘liq bo‘ladi.

4. Batutda sakrash

Batutda sakrash soatiga 600 kaloriya erishiga olib keladi. Faqat sakrash davomida texnika xavfsizligiga amal qilish, yosh va salomatlikni inobatga olish kerak.

5. Eshkak eshish

Eshkak eshish sporti soatiga 700 kaloriya erishiga sabab bo‘ladi. Bu sport bilan shug‘ullanishga hammada ham sharoit bo‘lmasligini inobatga olib, alternativ sifatida trenajor mashqlarini bajarish tavsiya qilinadi.