Gipertoniya: o‘limga ham sabab bo‘lishi mumkin bo‘lgan 5 ta yanglish fikr

Afsuski, qon bosimi, uning ko‘rsatkichlari, shuningdek, yuqori yoki past bosim bilan kurashish usuli haqida ko‘plab yanglish fikrlar mavjud. Ularning ba’zilari ochiqchasiga xavfli — salomatlik uchun ham, hayot uchun ham, deb yozadi “Noviy ochag”.

Yuqori qon bosimi — gipertoniya, bu surunkali kasalliklardan biri bo‘lib, uning ehtimoli 60 yoshdan keyin keskin oshadi va, afsuski, umrni sezilarli darajada qisqartirishi mumkin. Qon bosimi qanchalik baland bo‘lsa, yurak va qon tomirlari shunchalik ko‘p stressni boshdan kechiradi va yurak xuruji yoki insult xavfi yanada yuqori bo‘ladi. 40 yoshdan keyin shifokorlar muntazam ravishda bosim darajasini tekshirishni tavsiya qiladi va agar bir hafta yoki undan ko‘proq vaqt davomida uning qiymati 130/90 dan oshsa, darhol shifokor bilan maslahatlashish kerakligini ta’kidlaydi.

Faqat yuqori qon bosimi xavfli, agar u past bo‘lsa, xavotir olishning keragi yo‘q

Ammo me’yordan har qanday og‘ish, hatto pasaysa ham, har doim xavflidir. Bosimning keskin pasayishi fonida ishemik insult paydo bo‘lishi mumkin va yoshi katta bo‘lgan gipotonik bemorlarda ham gipertoniya rivojlanishi mumkin. Bunda hatto kundalik bosimning biroz oshishiga ham chidash juda qiyin. Bundan tashqari, doimiy past bosimga ega bo‘lgan odamlarda ko‘pincha bosh aylanishi, bosh og‘rig‘i kuzatiladi va ular tezda charchoqni his qiladi.

Yuqori qon bosimini ko‘z bilan aniqlash mumkin

Ba’zida yuqori qon bosimi bosh og‘rig‘i, quloqda shovqin, zaiflik, ko‘ngil aynishi, yuz rangining xiralashishi va ko‘zlarning qizarishi bilan namoyon bo‘lishi mumkin. Ammo bu keskin ko‘tarilgan bosimning belgilaridir, agar gipertoniya asta-sekin o‘sib borayotgan bo‘lsa, inson o‘zida hech qanday o‘zgarishlarni sezmasligi va kasallik xavfli bosqichga kirgandan keyingina o‘zini namoyon qilishi mumkin.

Qon bosimi uchun mo‘ljallangan dori-darmonlar faqat yuqori bo‘lganda qabul qilinishi kerak

Afsuski, bu yondashuv sog‘liqqa butunlay putur yetkazishning eng ishonchli usulidir. Shifokor buyurgan barcha dorilar yig‘iluvchi ta’sirga ega va ular doimiy ravishda qabul qilingan taqdirdagina xavfsiz bosim darajasini saqlab turadi. Shu bilan birga, gipertoniyani davolashda eng muhim narsa tabletkalarni qabul qilish emas, balki turmush tarzini o‘zgartirishdir. Chunki bu oxir-oqibat vaziyatni barqarorlashtirishga yordam beradi.

Gipertoniyani uy sharoitida davolash mumkin

Agar qo‘lda kerakli dori-darmonlar va shoshilinch shifokorning ko‘rish imkoniyati bo'lmasa, bosimni tezda pasaytirish mumkin bo‘lgan ba’zi usullar mavjud. Ammo bu choralardan favqulodda yoki yiliga bir martadan ko‘p foydalanmaslik kerak. Bundan tashqari, agar buning yordami bilan qon bosimi muvaffaqiyatli me’yorga kelsa ham, birinchi imkoniyatda shifokor bilan maslahatlashish kerak. An’anaviy tibbiyotda arterial gipertoniyani davolashning haqiqiy samarali usullari mavjud emas. Shifokorga murojaat qilish qanchalik ortga surilsa, sog‘liq ham shunchalik xavf ostida qoladi.

Yuqori qon bosimi yosh bilan bog‘liq kasallikdir, yoshlarning tashvishlanishiga hojat yo‘q

Arterial gipertoniya hatto bolalarda ham rivojlanishi mumkin, bundan tashqari, so‘nggi yillarda ortiqcha vazn va harakatsiz turmush tarzi tufayli bolalarda ham gipertoniya holatlari ortib bormoqda. O‘troq turmush tarzi, noto‘g‘ri ovqatlanish, chekish kabi zararli odatlar, irsiyat — bularning barchasi juda yosh davrda ham gipertoniya xavfini oshiradi. Shuning uchun qon bosimini muntazam tekshirib turish va biror o‘zgarish bo‘lsa, shifokorga tashrif buyurishni unutmaslik kerak.

Mavzuga doir:

• Organizmni ortiqcha zo‘riqtirmasdan qon bosimini qanday pasaytirish mumkin?
• Qon bosimini nazorat qilamiz: gipertoniyadan saqlanishning 3 ta oson usuli
• Qon bosimi past ekanligidan darak beruvchi hamda e’tibor qaratish talab etiladigan simptomlar
• Qon bosimining oshishiga sabab bo‘luvchi 5 holat
• Qon bosimi pasayganda qanday mahsulotlar iste’mol qilish tavsiya etiladi?