Bahorda soch to‘kilishining 4 asosiy sababi

Albatta, har qanday mavsumda ham sochlar to‘kilishi va o‘z jilosini yo‘qotishi mumkin. Aynan bahorda esa ularga yanada ehtiyotkorlik bilan g‘amxo‘rlik qilish kerak. Bundan tashqari, sochlar nima sababdan to‘kilayotganini bilish ham juda muhim.

O‘ta qattiq parhezda bo‘lish

Agar parhez tufayli ratsiondagi juda ko‘p mahsulotlar cheklansa hamda har bir kaloriya hisob-kitob qilinsa, o‘z-o‘zidan tanada vitamin va minerallar yetishmovchiligi yuzaga keladi. Muvozanatni buzmagan holda ovqat iste’mol qilish − qalin va yorqin sochlarni orzu qilganlar uchun muhim qoidadir. Buning uchun ratsionda go‘sht, parranda go‘shti, baliq, tuxum, dengiz mahsulotlari, sabzavotlar va mevalar bo‘lishi kerak.

Sochlarni tez-tez bo‘yash

Maxsus isitiladigan xonalarda haroratning pasayishi va quruq havo sochdagi namlikni tezda yo‘qotadi. Shuningdek, sochlarni silliqlash, jingalak qilish yoki shunga o‘xshash zararli protseduralar tez-tez amalga oshirilsa, demak, vaziyat ancha qiyin. Shuning uchun sochlarni quritadigan va shikastlanishiga olib keladigan holatlardan qutulish kerak. Turli xil kimyoviy aralashmalardan tashkil topgan bo‘yoqlar o‘rniga tabiiy yog‘ va niqoblardan foydalanish tavsiya etiladi.

Zararli odatlar

Chekish, spirtli ichimliklar, yetarlicha uxlamaslik, charchoq va stress − bularning barchasi yorqin va qalin sochlarning dushmanidir. Sochlari mustahkam bo‘lishini istovchilar esa tezroq sog‘lom turmush tarziga o‘tishi kerak.

Yetarlicha parvarish qilmaslik

Sochlarning holati yaxshi bo‘lsa, u holda sifatli shampun hamda konditsioner yetarli. Ammo mavsum almashish chog‘ida ular ko‘proq himoyaga muhtoj bo‘ladi. Bunda keng qamrovli parvarish, ya’ni soch va bosh terisiga har tomonlama g‘amxo‘rlik ko‘rsatadigan yuqori sifatli kosmetik vositalardan foydalanish kerak.