Kun besamar o‘tadi: ertalab amalga oshirish tavsiya etilmaydigan ishlar

Kunning noto‘g‘ri boshlanishi kayfiyat va umumiy holatga salbiy ta’sir ko‘rsatishi, ish faoliyatini pasaytirishi mumkin. Marie Claire nashri uyg‘ongandan keyin qanday harakatlarni odatga aylantirmaslik kerakligini ma’lum qildi.

Uyqu inson hayotining deyarli uchdan bir qismini egallaydi va organizmni dam olish va intensiv ravishda tiklash uchun mo‘ljallangan. O‘z navbatida, uyg‘onish jarayoni va tonggi soatlar kunning qolgan qismi qanday o‘tishini belgilaydi. Shuning uchun uni to‘g‘ri boshlash juda muhimdir. Qolaversa, kunning sog‘lom boshlanishiga ham, unumdorligiga ham hissa qo‘shmaydigan bir qator odatlar mavjud.

Uyg‘otkich uchun ko‘p signallarni o‘rnatmaslik

Ertalab sog‘liq uchun eng yaxshi sarmoya — bu signal chalingandan so‘ng darhol uyg‘onishni o‘rganish va uni besh daqiqaga kechiktirmaslik. Chunki bu yana uyquga olib keladi.

Ertalab turishni osonlashtirish uchun uyqu gigiyenasi deb ataladigan qoidalarga rioya qilish kerak: yotishdan oldin ovqatlanmaslik, telefonda vaqt o‘tkazmaslik yoki kechqurun televizor ko‘rmaslik. Aniq uyqu rejimini o‘rnatish tavsiya etiladi.

Uyqudan turib, darhol telefonga qaramaslik

Bu juda ko‘p salbiy oqibatlarga olib keladigan eng keng tarqalgan yomon odatlardan biridir. Birinchidan, juda ko‘p vaqtni oladi: ijtimoiy tarmoqlarni tekshirish va xabarlarni o‘qish, yangiliklar — daqiqalar soatlarga aylanishi mumkin. Ikkinchidan, uyg‘ongandan so‘ng darhol ekran bilan aloqa qilish asab tizimining holatiga yomon ta’sir qiladi. Ta’kidlanishicha, bu holatda yomon kayfiyat, xavotir va faollikning susayish xavfi ortadi.

Uyg‘ongandan so‘ng darhol yotoqdan sakrab tushmaslik

Ko‘z ochilishi bilan organizm hali to‘liq uyg‘onishga ulgurmaydi. U muntazamlikka muhtoj, uyg‘onish holatiga o‘tish uchun vaqt kerak. Organizm uchun to‘g‘ri holatni tanlash va asabiylashishning oldini olish uchun yotoqda yotish, nafas olish yoki yengil mashqlarni bajarish mumkin.

Och qoringa qahva ichmaslik va nonushtani o‘tkazib yubormaslik

Nima uchun nonushtani o‘tkazib yubormaslik kerak?Gormonlar ishlab chiqarilishi tufayli odam uzoq vaqt to‘qlikni his qiladi, ishtahasi pasayadi, bu esa o‘z navbatida vazn kamayishiga olib keladi. Ortiqcha vazn xavf omillaridan biri bo‘lib, uyqu apnesi sindromining rivojlanishiga sabab bo‘ladi — bu kasallikda uyqu paytida nafas olish to‘xtab qoladi va qonda kislorod darajasi pasayadi. Bundan tashqari, miyokard infarkti va insultning rivojlanish xavfi oshadi.

O‘z navbatida, och qoringa qahva ichish oshqozon shilliq qavatini bezovta qilishi mumkin, shuning uchun qahvani bir stakan suv bilan almashtirgan ma’qul. Nonushtadan keyingina bir chashka xushbo‘y qahva ichish tavsiya etiladi.

Qon bosimi yuqori bo‘lgan odamlar bu borada ko‘proq hushyor bo‘lishi kerak. Shuningdek, ertalab qon bosimini nazorat qilish va dori-darmonlarni qabul qilishni o‘tkazib yubormaslik kerak, chunki statistik ma’lumotlarga ko‘ra, insult va infarktning aksariyati tongda yuz beradi. Shuning uchun ham kunni sigaret chekish kabi yomon odat bilan boshlamaslik kerak. Qolaversa, chekishning o‘zi sog‘liq uchun juda zararli.